قهوه انح

شكلك تعبان ومتضايق شدلك كورسي واقعد تشرب ايه بقي مع قهوه انح مش حتقدر تزوغ م الحساب
 
الرئيسيةس .و .جبحـثالأعضاءالمجموعاتالتسجيلدخول

شاطر | 
 

 يالليله كومييييييييدي (((( يوميات ام ذكي)))) في قصه الحي الشعبي

اذهب الى الأسفل 
انتقل الى الصفحة : الصفحة السابقة  1, 2, 3  الصفحة التالية
كاتب الموضوعرسالة
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 19, 2009 12:16 pm

heba_cool02 كتب:
جامدةةةةةة موتت يا شجرةةةة
اما نشوف اخرة الرجالة الى بتتجوزهم ام زكى دىى يا خوفى لما اتجوز تيجى تاخد عريسىىى

هههههههههههه لاااااااا كلو الا عريسك يا هبه

اول لما تلاقيه تسافري وتحطيه في بنك من بنوك سويسرا

لحسن دول بقو عمله نادره lol!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 19, 2009 12:17 pm

safsofa كتب:
كان نفسى تتجوز الظابط يا ام زكى
هههههههه
قصدى يا شجرتى
انتى عارفه طبعا انى عايزة اتجوز ظابط فكنت عايزة اعرف طقم الحنيه جه معاه سكة ولا لا

ههههههههههه

لا يا صاااااافي الظباط مبياكلش معاهم طقم الحنيه ده

ونصيحه مني ابعدي عنهم خاااااااااااااالص

علشان سيرتهم الايام دي علي كل لسان

وبصراحه ايديهم طارشه lol!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 19, 2009 12:21 pm

الحلقه السادسه


المعركة الفاصله

فكيهه : كنتى عايزه تقولى أيه ياوليه يا خرفانه أنت.. عايزه تفهمى البت أن أبوها أتجوزك قبل منى ..طب قوليلها كده وشوفى أيه اللى حيحصلك

أم زكى : لا يا حبيبتى مابكلش من التهديد ..وفيها أيه يعنى لما تعرف أن مرسى أتجوزنى قبل منك فيه أيه يتعايب... عوجه ولا مكسحه ولا وحشه

فكيهه : حتقللى من قيمة الراجل فى نظر البت لما تعرف أنه كان متجوز واحده مجنونه زيك أتجوزت عشرين مره

> شوفى أحفظى مركزك ولا عشان صاحبة ملك فاكرة أنى حخاف منك..غيرش جوزك خدك عشان طمعان فى البيت التعبان ده لو حزموه يرقص.. روحى روحى خلى يومك يعدى

> يانهار أبوكى مالوش لون طب خدى دى فى وشك
( وتشتبك فكيهه مع أم زكى فى معركة أستخدم فيها جميع وسائل القتال الحريمى من عض وشد شعر مع الأستعانه بالشباشب ويرتفع صريخهم للجو فتجمع الجيران على باب الشقة وهم يحاولون فتح الباب ..وتهدأ الأصوات فى الداخل)

أم خليل : يالهوى الأتنين ماتوا
سعيد مانفله: أحسن على الأقل نخلص من طولة لسانهم
(ينفتح الباب بعد قليل وتخرج أم زكى منتصره وهى متورمة العينين ممزقة الثياب وهى تسحب فكيهه الممده على الأرض خارج الشقه )

أم زكى : شيلوا الوليه دى من هنا
قشطه تشاهد أمها على الأرض ترقع بالصوت وتهجم على أم زكى وتطرحها أرضا أنتقاما منها ولا يستطيع أحد أن يقف أمام قوة وعنفوان قشطة التى أشبعتها ضربا حتى أغمى عليها هى الأخرى لتتمدد بجوار فكيهه
تقف قشطه بعد أن تنهى مهمتها وتنفض يدها.. هاتوا الأسعاف يشيلوا الأتنين النسوان دولت من هنا
تنقل المرأتان فى سيارة أسعاف واحده وترافقهم قشطة إلى المستشفى للعلاج


أم زكى وهى تأن : كده يا قشطه تعملى فيه كده أنتى وأمك قبل ما خلصلك حكاية العمدة وحكاية أبوكى مرسى

قشطه : آدينى قاعده معاكم فى المستشفى لحد ما تخفى أنتى وهى ..ونكمل بقية حكاياتك المقندله
( تنقل المرأتان بعد العلاج فى عنبر الكسور والجروح وتطمأن قشطه عليهما وتهم بالأنصراف فتسمع صوت أم زكى )

أنتى رايحه فين ياقشطه ماتيجى أأقعدى جنبى شويه أحكيلك حكاية العمده القفل
> مش فضيالك ياوش الفقر بكره لما آجى

> وحياتك ياقشطه أبقئى بيتى الفراخ وأقفلى باب المنور وماتنسيش تجيبى معاكى وأنتى جايه لتر حاجه ساقعه وسندوتشين حلاوه بالقشطه وعلبة المكياج من على التسريحه
قشطه وهى تصرخ يااااااهه م أتخمدى ياوليه





كوكوكووووووووووووووووووو

وسمعني احلي سلام

يدن الديك اصحي قوام اعجن واخبز واسقي الحمام

هروح اسقي الحمام واشوفكم بكره مع جزء جديد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
zizo
دراع المعلم اليمين
دراع المعلم اليمين
avatar

عدد الرسائل : 240
العمر : 25
تاريخ التسجيل : 08/02/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأربعاء فبراير 25, 2009 5:20 am

بجد موضوع جميل

نايس





الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
dodo alaa
صوباع المعلم اليمين
avatar

عدد الرسائل : 52
العمر : 23
تاريخ التسجيل : 06/02/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأربعاء فبراير 25, 2009 3:39 pm

حلوة اوى القصة دى يا شجرة الدر بس هى كده خلاص ولا فى باقى ليها
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mody
مساعد صبي القهوه
avatar

عدد الرسائل : 37
العمر : 27
تاريخ التسجيل : 23/02/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 26, 2009 6:39 am

هههههههههههه

جميله اوى الحلقات دى يا شجرة الدر
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 26, 2009 3:46 pm

zizo كتب:
بجد موضوع جميل

نايس






ميرسي يا زيزو واستناني هنزل باقي الاجزاء دلوقتي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 26, 2009 3:49 pm

dodo alaa كتب:
حلوة اوى القصة دى يا شجرة الدر بس هى كده خلاص ولا فى باقى ليها


ميرسي يا دودو

ولسه في اجزاء تانيه

واسفه اني اتأخرت في الاجزاء التانيه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 26, 2009 3:52 pm

mody كتب:
هههههههههههه

جميله اوى الحلقات دى يا شجرة الدر


شكرا يا مودي

وانتظر باقي الحلقات ويارب تعجبك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الخميس فبراير 26, 2009 4:01 pm

نظرا لفتره غياب طويله في المنتدي

فأنا قررت انزل جزأين مع بعض ونكملهم تاااااااني بكره زي ما اتعودنا كل يوم جزء


ودول الجزأين السابع والتامن



الحلقة رقم (7)


غيرة الستات

تتنازل كل من أم زكى وفكيهه عن المحضر ويتم الصلح بينهما
ويعودان سويا من قسم البوليس
فكيهه: عارفه ياوليه لو جبتى سيرة جوازك من مرسى حدبحك وأشرب من دمك
وتسيبى البت فى حالها خلينا نسترها وما تلعبيش فى مخها
زى مالعبتى فى دماغ البت عطيات اللدغه وفضلتى وراها لحد ماطلقت مرتين

وقاعده فى بيت أبوها زى البيت الوقف وسيبك من حكايتك
وسيرتك المنيله بنيله أللى تخرب البيوت

أم زكى : مكسوفه ان أحكى لبنتك حكاية مرسى وأللى عملته فيه

ولا خايفه البت تعرف أن أبوها كان مغرم صبابه فيه
فكيهه : قال مغرم صبابه قال بأمارة ما علقك من رجليكى زى الدبيحه

ورزعك العلقه المتينه ولبسك حلقة الطبيخ فى راسك

أم زكى : وماله ضرب الحبيب زى أكل الزبيب
فكيهه: زبيب أيه ياموكوسه دا لولا الناس حاشوه كان موتك..أتلهى وأسكتى

أم زكى :أسكت ليه ياختى .. مرسى بتاعك ده أللى عامل فيه قمع..

دا أنا أللى نضفته وخليت عليه القيمه... وأخدتيه على الجاهز يا حبيبتى

فكيهه : ياوليه مش حتتكسفى تحكى على أللى عملتيه فى الراجل

أم زكى : وأتكسف من أيه واحده وبتغير على جوزها لازما تعمل أللى عاملته

فكيهه: فى واحده فى الدنيا تروح تفتن على جوزها لشريكه بالكدب علشان غيرانه من

مراته ..تخلى الرجاله تقع فى بعض ويفضوا الشركه أللى بينهم

وتتسببى فى طلاق الوليه دا أنتى مش حتتعرضى على جنه

أم زكى : أعمله أيه كل يوم ييجى يقول: شوفتى مراة شريكى عملت..

شوفتى مراة شريكى سوت.. وعمال فى الرايحه والجايه يمدح فيها

ولا كأنها ملاك نزل من السما ومفيش ستات غيرها فى الدنيا

فكيهه : عايز يعرفك أنك ست معفنه وماتستحقيش العشره..

تقومى رايحه لجوزها ومخترعه كلام فارغ أن جوزك على علاقه بمراته يامفتريه ياكدابه

أم زكى: أهو أخد له علقه مايخدهاش حمار فى مطلع

فكيهه: أنا لو منه كنت قطعت من لحمك المكعبر ده ورميته للكلاب قبل ما يطلقك


أم زكى : طب فيها أيه ..بنتك تعرف على الأقل ماتتصرفش زى

ما أنا أتصرفت وخسرت مرسى حبيبى

فكيهه: ما تقوليش حبيبك حبك برص..وألا حديكى بوكس فى عينك التانيه أخليكى تطلعى تشحتى جنب السيده

أم زكى : طب أدينى كده شوفى أيه أللى يحصلك

فكيهه: أم زكيييييييييى... غورى من وشى الساعة دى والا حبهدلك

>انا عايزه أشوفك حتعملى أيه يا أم قشطه
(ويمسك الأثنان فى خناق بعض وهما مازالا على بعد خطوات من قسم البوليس


فيسحبهما المخبرين إلى الداخل لتوضعا فى الحجز مرة ثانيه







الحلقة رقم ( 8 )

فى الحجز

تجلس فكيهه وأم زكى فى الحجز متباعدتان وتبدأ أم زكى

بممارسة هوايتها مع النسوة المحتجزات فى التخشيبه

أم زكى : اسمك أيه ياشابه ياحلوه أنتى

> أسمى ريهام ياطانت ..ومحجوزه هنا ليه ياست ريهام ..

سميت جوزى ونقلوه المستشفى ومستنيه أتعرض على النيابه الصبح

أم زكى :خير ما عملتى أكيد ضبطيه بيلعب بديله.. كل الرجاله كده عايزين الحرق

أسألينى أنا ..عارفه طفاستهم

ريهام : لا يامدام.. ياريته كان لعب بديله كان أرحم

أم زكى وهى تتعجب : أومال بسلامته عمل أيه عشان تسميه يا حبيبتى

ريهام : بيشك فيه أنى بحب توتو أكتر منه

أم زكى : أكيد توتو ده أحلى منه ونايم على قرشين كويسين بس برضه

ماتديش الأمان لسى توتو ده كل الرجاله خاينين أقربهم جوز الوليه

أللى هناك دى أم راس مبطوحه( تشاور على فكيهه)

فكيهه :أتلمى يا أم زكى لأقوملك

أم زكى : سيبك منها ياريهام ياحبيبتى خلينا فى موضوعنا ..

هو سى توتو ده عنده كام سنه

ريهام: عنده خمس سنين بس
أم زكى : جوزك ده باين عليه أهبل ويستاهل تسميه وبعد كده تولعى فيه
ريهام : المجرم جوزى سمه

> سمه الراجل أللى ماعندوش قلب ولا ضمير ..يسم عيل صغير

> عيل عيل توتو ده الكلب بتاعى
> كلب يابنت الـ ... قومى من هنا يابت تتك طاعون يلهفك
تسمى جوزك علشان حتت كلب ولا طلع ولا نزل الله يخرب بيتك

الناس مش لاقيه تاكل وأنتى بتربى كلب خليه ينفعك عند حبل المشنقه
أم زكى تقوم تتجول فى الحجز وتختلط بالموجودات ويلتفوا حولها النساء

والبنات وهى تحكى لهم تجاربها فى عالم الرجال والأزواج وهى فى قمة سعادتها

لقيامهن بالأنصات إليها وتجلس فكيهه بعيدا عنهن ولكنها ترمى أذنيها لسماع

حكايات أم زكى ومغامراتها الشيقه
أم زكى :جوازتى رقم تسعه كانت من العمده القفل ..

شافنى العمده فى فرح جماعه قرايبى وكنت وقتها أيه متزوقه

ولابسه الفستان الأحمر الشيفون أبو ترتر وعامله شعرى عند الكوافير

وحاطه جميع الألوان فى وشى وكنت زى فلقة القمر
فكيهه من بعيد وهى تضحك ضحكه عاليه : يابنت الكدابه

أم زكى : اخرسى ياوليه (وتستمر فى سرد قصتها ) مايغركوش منظرى دلوقتى

علشان لسه طالعه من تلات خناقات مع الوليه أللى هناك دى هى

وبنتها أنما كنت وأنا صغيره كانت عنيه زرقاااء وشعرى أصفاااار

وكان أللى يشوفنى يطلخبطت بينى وبين زهرة العلا الممثله
فكيهه: قصدك نعيمه الصغير
ههههههه هئئئئ هههههههسس تضج غرفة الحجز بالضحك

> خلاص ضحكتم نكمل ..الراجل العمده شافنى أتلحس ومانزلش عنيه من عليا

.فعملت نفسى مش واخده بالى وهو عمال يسأل عليا قرايبه أللى فى الفرح

وقام قايم جاى لحد عندى ..مسا الخير ياست الكل أحب أعرفك بنفسى

أنا محسوبك جمعه البسطاويسى عين أعيان الصعيد وعمدة كفر بسطا فى قنا

..تشرفنا ياعمده

عرفت من جرايبى أنك عازبه وأنا يكون ليه الشرف أنى أطلب أيدك
أنا على طول قمت نازله بطقم الحنيه بتاعى

فكيهه: الله يخرب بيت طاقم الحنيه بتاعك أللى ودا الناس فى داهيه
أحد المحجوزات : أنما أيه طقم الحنيه ده يا أم زكى

أول حاجة تعملى أنك خجلانه وبتتكسفى موت وتحمرى فى خدودك ودلدلى رقبتك وتتكلمى بالسوسو

> أيه السوسو ده كمان يا أم زكى

> يعنى تصوصوى زى الكتاكتيت وتتنهدى زى الست ماجده الممثلة وتسبلى كل شويه فى عنيكى وأياكى يمسك أيدك ليبوظ الشغل ولو بص فى عنيكى تبصى بصه واحده بس

وتغمضيهم وكلامك كله همسسسس وبشويش وبشووووووووويش خالص بس الكلام ده عايز تدريب وشوية حبشتكنات

> أيه بقا الحبشتكنات دى

> لبسك وذواقك وتسريحة شعرك.. ريحتك.. وريحتك دى أهم حاجة ..الرجاله بتيجى ع الريحه ههههههههه وفيهم ناس قلبهم فى مراخيرهم مش فى معدتهم

(النساء يقعن من الضحك عليها..هههه ههههههههه هئهئهئهئه خخخخخ)

> بس ياخاله دى حركات قديمه من أيام فاطمه رشدى وعلى الكسار

أم زكى : أيه خاله دى تتك خوت يخوتك ..أنت يابت عندك كام سنه
> عندى 27

> مابقاش خلتك ياروح مامتك ..دنا يادوبك أكبر منك بتلات أربع عشر سنين

النساء يضحكن من قلوبهم ومنهم من أفترش الأرض

أم زكى : أضحكوا أضحكوا بكره تاخدوا كلكم أعدام تتكم القرف

محسوبين على الستات غلط ياحثالة المجتمع ياجزم على شباشب




الشاويش يفتح غرفة الحجز وينادى : أم زكى الدلاله وفكيهه عوض الله أفراج
بعد دفع الغرامه

أم زكى : مش ممكن ياشاويش أستنى هنا شويه لحد ما كمل حكاية العمده القفل
الشاويش: قومى ياوليه ياخرفانه أنتى فاكره نفسك قاعده فى الفسحه فى بيتكم
قومى أنجرى أنت وهى.. تتكم القرف فى مناظركم

أم زكى : أنا كل ماجى أقول حكاية العمده القفل ماتكملش

فكيهه : يظهر أنه كان قفل مسوجر ههههههه كركركركررر
الشاويش : بتجولى أيه ياوليه أنت وهى

أم زكى : مفيش ياحضرة الصول... العمده كان فيه شبه منك

(يبتسم الشاويش وهو يبرم فى شنباته ) هو حضرتك متجوز

الشاويش : كنت متجندل بستين طين وربنا خدها وأرتحت منها عندك عروسه

أم زكى : عندى أللى يستهلك ويستاهل شنبك أللى يقف عليه السبع

فكيهه: أنزلى بطقم الحنيه ياوليهش

أم زكى : بلاش نق وحياة أبوكى خلينا نشوف شغلنا .. ربنا ما يجعلنا جار يكون ليه

عينين ..روحى ياختى لعيلاك أنا قاعده شويه فى القسم

فكيهه: آلهى يارب ماترجعى منه يابعيده

ههههههههههه





وكوكوووووووووووووووووووو

واشوفكم بكره في حلقه جديده
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
journalist safsofa
مشرفة القسم الاسلامي
مشرفة القسم الاسلامي
avatar

عدد الرسائل : 2045
العمر : 28
الموقع : alex
تاريخ التسجيل : 08/11/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الجمعة فبراير 27, 2009 8:05 pm

يالهووووووووووووووووووووى

ازاى بعد ما عطت امها علقه قعدت اتكلمت معاها تانى

ايه الوليه اللبط دى

بس القصه احلوت اوى اي شجرة

بس ياترى فاضل كام جزء؟؟؟؟؟؟؟؟؟؟

_________________
url=http://www.0zz0.com][/url]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
zizo
دراع المعلم اليمين
دراع المعلم اليمين
avatar

عدد الرسائل : 240
العمر : 25
تاريخ التسجيل : 08/02/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   السبت فبراير 28, 2009 5:32 am

القصة جميلة اوووووى

ممكن تنزلى كل الاجزاء بسرعة

لانى متشوق جدااااااا


ومرسى ليك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
amrmoonlight
دراع المعلم اليمين
دراع المعلم اليمين
avatar

عدد الرسائل : 110
العمر : 28
تاريخ التسجيل : 28/01/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأحد مارس 01, 2009 6:51 pm

ههههههههههههههههههه
بجد يا شجره قصه تحفه وجميله اوى
بس ام زكى المفروض يعملولها تمثال ويطبعلها كتب ويسموها نصاءح للفتيات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الإثنين مارس 02, 2009 1:21 pm

safsofa كتب:
يالهووووووووووووووووووووى

ازاى بعد ما عطت امها علقه قعدت اتكلمت معاها تانى

ايه الوليه اللبط دى

بس القصه احلوت اوى اي شجرة

بس ياترى فاضل كام جزء؟؟؟؟؟؟؟؟؟؟

ههههههههههههههه

انتي عسوله والله يا صافي

وياستي لسه فاضل شويه اجزاء حلوين بس مش هقولك كام Razz

وتابعيني
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الإثنين مارس 02, 2009 1:49 pm

zizo كتب:
القصة جميلة اوووووى

ممكن تنزلى كل الاجزاء بسرعة

لانى متشوق جدااااااا


ومرسى ليك

منور يا زيزو الحدوته

وحاضر ياسيدي هنزل 3 اجزاء النهارده مره واحده علشان خاطرك

وميرسي لمتابعتك جدا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الإثنين مارس 02, 2009 1:52 pm

amrmoonlight كتب:
ههههههههههههههههههه
بجد يا شجره قصه تحفه وجميله اوى
بس ام زكى المفروض يعملولها تمثال ويطبعلها كتب ويسموها نصاءح للفتيات

عمرو ميرسي ليييييك كتييييير

وعيوني حاضر هعمل لها تمثال بس انتو الخسرانين ههههههههه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الإثنين مارس 02, 2009 2:09 pm

الحلقة رقم (9)


سيد صنفره

أم زكى تشاهد سيد صنفره خطيب قشطه وهو يدخل البيت فتسرع لتفتح باب شقتها وتنادى عليه وتدعوه للدخول
أم زكى: صباح الخير ياأسطى سيد ..
> صباح النور يا أم زكى هو حييجى منين الخير بأصطباحتك عايزه أيه
ام زكى : ماتيجى تشرب القهوة يا أسطى دا أنا عندى بن أنما أللى هوه
> مره تانيه عشان مستعجل
> بقول أيه. قال صحيح أللى سمعته أنك متخانق مع نسايبك وناوى تفضها سيره
> أيوه فعلا متخانقين بس مش حسيب قشطه
> بلا نيله دا أنت تستاهل ست ستها ..وعندى أللى ترضى بتراب رجليك
> ياوليه أتقى الله
> أدخل بس تعال حفرجك صورهم وتشرب القهوة تعال ماتقطعش برزقك
( يدخل سيد شقة أم زكى ويجلس فى الصاله )
أم زكى وهى تعرض عليه صور العرايس)نقى ياسيد وأختار بنات وستات زى الفل ومتريشين وعندهم شيئ وشويات
> دى صورة (لواحظ) بنت عبده الفكهانى
> عارفها البت دى سوابق وشلق وأمها بتضرب بالروسيه
> بلاها لواحظ شوف( نحمده ) البت عليها جوز عيون ولا عينين البقر أسم الله عليك وعندهم بيت ملك وعربخانه وعالم متريشه
> مش البت دى بنت عيسوى العربجى ..هو حد قدهم دول عالم بترفس والحمير أللى عندهم بتفهم عنهم مش ناقص بلاوى وحياة أبوكى
> خلاص ياسيد آخر واحده بلاها لواحظ ونحمده..شوف دى قمر يا خواتى قمر
دى (بدريه) وهى زى البدر المنور
> هى فعلا حلوه قوى يا أم زكى ماشفتهاش فى الحاره قبل كده
> عجبتك ..لو عجبتك أشدلها تليفون دلوقتى تتفرج عليها وتقعد معاها
> واحده واحده عليا يا أم زكى لما نشوف أيه أللى ح يحصل مع جماعة قشطه وبعدين نبقى نشوف موضوع بدريه عن أذنك لما أطلعلهم
> بقولك أيه ياسطى خليك حمش وما يهمكش من حد أطلع أرمى الدبله فى وشهم وتعلالى نكمل الكلام وأحكيلك حكاية العمده القفل
> تانى يا أم زكى أنا عارفها سبينى الله ما يسيئك
( يصعد سيد السلم فيجد قشطه فى أنتظاره أمام باب شقتها والشرر يتطاير من عينيها وتسد الباب بذراعها وتضع اليد الأخرى فى وسطها )
قشطه : كنت فين ياسطى بقالك نص ساعة داخل من باب البيت
سيد : كنت عند أم زكى كانت بتسألنى على حاجه
> أنت فاكرنى هبله الوليه دى كانت بتفرجك على صور العرايس أللى عندها
> لا لا أبدا ياقشطه
> ماشى ياسيد حسابنا بعدين خش أبويا مستنيك جوه
سيد: صباح الخير يامعلم مرسى
مرسى : أقعد ياسيد بقالك جمعتين محدش شافك تكونش زعلان من الكلمتين أللى قالتهم خالتك فاكيهه
سيد : همه مش كلمتين يا عم مرسى دى بهدلتنى ليه وليه أقول أن أمى حتقعد معانا فى المطرح ..يعنى أرميها فى الشارع ياناس يرضى مين الكلام ده
مرسى : تقعد عند أخت من أخواتك البنات ولا تفضل فى أوضتها وتبقى تشقر عليها يا أخى
سيد : أزاى يا معلم تقعد فى بيوت أجواز أخواتى البنات وأنا أبنها راجل كسيب وبعدين هى ست كبيره تقعد لوحدها أزاى ومين يخدمها
مرسى : بس أحنا ما أتفقناش على كده يا سطى وبعدين أمك صحيح ست كبيره بس لسانها متبرى منها وحتخلى عيشة البت نكد فى نكد
> ياعم مرسى ماتقولش كده على أمى مايصحش
> يابنى أنت حر فى أمك وأحنا أحرار فى بنتنا ..وفرت ليها مسكن لوحديها أهلا وسهلا ما أمكنش أنت من سكه وأحنا من سكه
> ياعم مرسى ماكانت حماتك ساكنه هنا معاك وكنتم عايشين أيه اللى حصل
تتدخل فكيهه: نعممم نعم ..هو أنت حتجيب أمك زى أمى ..أمى كانت قاعده فى ملكها يا ضنايا وخيرها كان على الكل وعمرها ماكان ليها دعوه بحد... أكلم كويس ياسيد
> خلاص ياست فكيهه حقكم عليا بس أنا شاريكم لحد آخر وقت عشان خاطر قشطه وعم مرسى أللى فى مقام أبويا ولما أشوف حل فى المشكله دى أبقى أرد عليكم ..سلام
يخرج سيد وهو غضبان فتجرى ورائه قشطه : سيد ..سيد ..أستنى ياسيد
قشطه وهى تبكى : عاجبكم كده أهو نزل عند أم زكى
تنظر فكيهه ومرسى بأستغراب وهم يقولون : أم زكى..تااااانى








الحلقة رقم (10)


بدريه النسايه

أم زكى:جدع ياسيد أديهم على دماغهم من دلوقتى لأحسن يركبوك
سيد : بس صعبان عليا قشطه قوى يا أم زكى.. البت جدعه ومفيش زيها
> تغور من وش أبوها وأمها .. على ما تشرب قهوتك تكون بدريه وأمها وصلت وتشوف بعينك ياوله الجمال والأدب
> طب أحكيلى يا أم زكى ظروفها أيه بدريه ..أصل مش ممكن تكون بالحلاوه دى وما تتجوزش لحد دلوقتى
> غلبانه ياسيد مالهاش حظ كل ما تتشبك لواحد يفك منها.. حد عاملها عمل
> عمل أيه يا م زكى هى أتشبكت كام مره
> مافيش بتاع خمس ست مرات بس
> يانهارأبوكى أسود أنت أتجننتى ياوليه الموضوع أكيد فيه إنه
> ولا إنه ولا حاجه ..مفيش نصيب ..ربنا يجعلها من قسمتك ونصيبك ياسيد
يدق الباب فتفتح أم زكى وهى ترحب ببدريه وأمها خدوجه..
لواحظ : يظهر عندك ضيوف ياخالتى
> خشى يا حبيبتى مفيش حد غريب ده الأسطى سيد أبن حتتنا راجل مجدع وكسيب وعازب ولسه مادخلش دنيا
(تجلس بدريه بالقرب من سيد وهى تظهر الكسوف وتشاور لها أم زكى من طرف خفى أن تبدأ بتنفيذ تعليماتها والنزول بطقم الحنيه أياه )
أم زكى : أيه رأيك ياسيد فى عروستنا
سيد : ماشاء الله أدب أيه وأخلاق أيه وحلاوة أيه ما فيهاش حاجة تتعايب
خدوجه : وكمان ياسطى بدريه متعلمه ومعاها دبلون التجاره وأبوها مارضاش يشغلها ..خايف عليها
سيد : خير ما عمل ياست خدوجه بس ليا سؤال ولامؤاخذه تسامحونى فيه
خدوجه : أسئل يا حبيبى هو السؤال حورم
سيد : أنا عرفت من أم زكى أن العروسه أتشبكت خمس ست مرات ومايحصلش نصيب أقدر أعرف أيه السبب؟؟
خدوجه : زى ما قولت كده نصيب ..واحد طلع بخيل جلده والتانى طلع أبن أمه والتالت بيضرب بنجو والرابع بيغير عليها من الهوا الطاير وبيشك فى أى حاجه والخامس طلع متجوز والسادس داخل على طمع والسابع عايز يقعدها مع أمه
سيد وهو يتعجب : سبعه ياحاجه مش شايفه أنه كتير .. ما علينا الحقيقه عروستنا ما تتعايب..بس أنا يا جماعه أللى حتجوزها لازم تعرف أن أمى حتقعد معايا قولتوا أيه
ام زكى : وماله ياخويا هو فيه أحسن من أم سيد وأدبها ولسانها أللى بيسقط سكر ومربى
> وبغير موت وشكاك ..
> حتى الراجل أللى ما بيغيرش ما يبقاش راجل ..وشك براحتك ياخويا
> وبشرب بانجو كل سبت وحد وساعات طول الأسبوع لما يكون فى أيدى شغل
> هو فيه حد ما بيشربش دا العيال فى المدارس بيشربوه وبدريه بتموت فى ريحة البانجو
سيد : ياعنى أنتم موافقين على كل العيوب دى كلها والعروسه مفيهاش ولا عيب
خدوجه : الكدب خيبه طالما كلمتنا بصراحه نقولك بصراحه عشان ما نظلمكش ويبقى كله على نور ..هى فيها عيب صغنن قد كده وهو ما يعتبرش عيب أنما الواحد يقول أللى ليه وأللى عليه
سيد : ايه هو بقى أحب أعرفه
أم زكى : عروستنا من النوع أللى بينسى ..نسايه يعنى
سيد : نسايه أزاى يعنى ..بتنسى تاكل ولا بتنسى تشرب ولا بتنسى تنام ولا أيه بالظبط فهمونى الحته دى
خدوجه : تتك أيه ياسطى ..دمك زى الشربات..أهى بتنسى ساعات بس بتفتكر على طول لما حد يفكرها
سيد : يعنى ممكن تنسى أن خطيبها ولا جوزها
أم زكى : ممكن برضه بس أول ما تقولها أنك جوزها أو خطيبها تفتكر على طول أسم الله عليها وممكن ما تعرفكش مسكينه من العوملات والعكوسات
سيد يفزع ويوجه كلامه لبدريه : أنا مين يابدريه
بدريه: أنت الأسطى سيد ..( أمها وهى تهتف الله أكبر خمسه عليكى )
سيد : طب سؤال تانى ..أنا بشتغل أيه
بدريه وهى متردده ( فتشاور لها أم زكى بيدها وهى تقلد السمكرى) :أنت أنت
بتشتغل نجار مسلح (تشاور لها أم زكى بخطأ الأجابه ) بتشتغل ..بتشتغل فى مطعم بتقدم طلبات ..لأ لأ أفتكرت بتشتغل سواق ترماى بدورين
سيد : لا دى حالتها صعبه قوى ..طب جايبينك هنا ليه
بدريه : علشان تأخد مقاس رجلى عشان تفصلى برنيطه
سيد : الله يخرب بيتك يا أم زكى وفى مجايبك أللى زى وشك ..سلام
أم زكى : أقعد ياسطى ..أستنى ياواد فيه واحده تانيه زمانها جايه
سيد : ولا تانيه ولا تالته يغوروا من وشك ..جايبالى واحده مجنونه يابنت الـ...
> أستنى .. ياوله ..خد لم أقولك ..روح تتنك نايبه ياسمكرى الهم والغم
بدريه : هو مشى ليه ياخالتى ..هو راح يجيب الشبكه
أم زكى : لأ راح يجيب الكلبشات ..خدى أمك وورينا ياله عرض كتافكم مش ناقصين جنان .. برنيطه يابدريه مش عارفه تقولى كاب ولا طاقيه..





الحلقة رقم (11)



مغامرات أم زكى فى الصعيد الجوانى


> بصيت لقيت نفسى جوه أوضه مقفوله عليا وشباكها حديد متشعلق فى السقف زى الزنزانه قعدت أصوت وأصرخ وأهبد فى الباب لحد ما تفتح الباب وألاقيلك العمده قدامى وماسك فى أيده كورباج سودانى
> عايزه أيه ياوليه أكتمى خالص تتك نصيبه تاخدك..أنا معايا حكم بالطاعه لو خرجتى من هنا مالكيش حاجه عندى
قشطه : مانزلتيش ليه بطقم الحنيه بتاعك
> وحياتك نزلت بكل أطقم الحنيه أللى عارفاها أن الراجل يلين ..قفل مسوجر ومفتاحه ضايع وأللى طالع عليه فين حتتين الصيغه أللى جابتهملك..أقول له بعتهم يقولى : لع ماوكلاش من الكلام ده حتجبيهم وألا حنسويكى بالكرباج ده

> ياعمده فى طولك فى عرضك أنه يلين مفيش فايده..قولت له طب رجعنى مصر وأنا أجيبهملك قالى لما يجيلى مزاجى أبجه أرجعك ..أنجرى قدامى تعالى ساعدى الحريم فى الدار ..شوفلها هدمه تغطى بيها جتتها
قعدت كتير فى دار العمده شهر أخدت على نسوانه وأخدوا عليا وكل ليله يتلموا حواليا وأنا بحكيلهم عن جوازاتى السابقه ..الستات فى قبلى غلبانين قوى صعبوا عليا وحياتك ..قولت يابت نوريهم دا العلم نورن ..وبدأت معاهم دروس محو الأميه الزوجيه وأول ماييجى العمده نبطل كلام وكل واحده تجرى على أوضتها وفى يوم جالى العمده الأوضه
> أيه يا أم زكى عقلتى ولا لسه الجنان راكبك
> عقلت يا خويا ..مش ترجعنى مصر بقى
> أنا عايز أعرف أنتى بتقعدى تتسايرى مع الحريم بتقوليلهم أيه ..أنا شايف أن أحوالهم أتغيرت أوعى تكونى بتقوللهم الكلام الفارغ بتاع البندر لشرب من دمك الستات دى أستاندر ماحدش لعب فى مخهم ع الزيرو يابت الفرطوس
> بذمتك ياعمده مش حالهم بقى أحسن دا أنت ياراجل كنت مجوز تلات رجاله من غير شنبات
> أيوه صوح بجت ريحتهم حلوة ألا البت بخاطرها لسه بعبلها
> وأيه كمان يا عمدتى
> عيب ماقدرش أقول ياوليه
> تبقى تشكرنى وتسيبنى أروح بلدى ومش عايزه الخمسين ألف المؤخر وأدينى أربعين ويادار ما دخلك شر
> قومى ياوليه قبر يلمك
> طب خلاص خليهم 35 ..أوكازيون ياعمده
قعدت شهر كمان فى بيت العمده ونسوانه حبونى موت ألا البت (بخاطرها ) تتها شكه فى قلبها كانت ما بتطقنيش ودى مراته التالته أللى أجوزنى عليها وماكنتش بتنفذ الكلام أللى كنت بقوله ففضلت زى ماهى ما تغيرتش والعمده كمان أداها الطرشه وما بقاش يعتب أوضتها وهى شويه وحتولع لحد ما جاتلى يوم أوضتى وقفلت علينا الباب وفى عنيها الشر وماسكه شومه ..قولت فى نفسى أتشاهدى على روحك يا أم زكى ..حتكون نهايتك النهارده مع الوليه المقلحفه دى فقمت مشغله الفهامه وقولت أخدها بالحنيه وأنا غريبه ماليش حد والعمده مسافر
> يا أهلا وميت سهلا بست بخاطرها بنت الأصول الطيبه ..والله ياشيخه ولا ليكى عليا حلفان كنتى على بالى وكنت جايه أزورك ونقعد نتحتت سوا
بخاطرها : أجعدى مكانك ياوليه وألا حضربك على راسك بالزوجله وأسمعى الكلام أللى حجولك عليه وأوعى تفتحى خشمك
> اللى أنتى عايزاه ياحبيبتى ..دا أنا بحبك لله فى لله
> شوفى من ساعة مجيتك الشوم وأنا ما بيبصلى العمده ولا بيعبرنى وكل ليله عند واحده فيكم تفتكرى ليه
> ماهو أنتى يابخاطرهم مابتسمعيش الكلام ..أهدى وأنا حخليكى أحسن وأحلى واحده فى الدار بس هاتى ودنك معايا وأفهمى الكلام أللى حقولك عليه بس أبعدى الشومه دى بعيد وصلى على النبى
> عليه الصلاة والسلام قولى يا أم زكى
> دا حيبقى درس خصوصى ما قلتوش لحد قبلك ولا بعدك وحخليكى آخر ألسطه
> جولى ياوليه وبلاش لف ودوران
> مش بتعرفى تكتبى ..خدى الورقه والقلم وأكتبى الطلبات دى
> دا أنا الوحيده فى الدار ساقطه تانيه أعدادى جولى وخلصينى
> ونعمه العلام ياحبيبتى بس لو تسيبك من العصبيه دى أكتبى
ليفه حمرا جديده بس تكون خشنه من بتوع النخل + حجر خفاف للقشف + وبرطمان كريم جلسرين من الأجزخانه + شمبو للشعر الأكرت + كريم وزيت شعر + سلك مواعين
> مفهوم حبعت الواد زعيط يجيبهم من البندر
> دى أول مرحلة ننزل البلاوى أللى على جتتك ونصنفرك وحتستمرى على كده أسبوع لحد ما يظهر جلدك أللى خلقك بيه ربنا وبعد كده نخش على المرحلة التانيه والتالته والرابعه
> المهم لو العمده مارجعش زى الأول يدخل عندى حكسرك وأتوايكى فى الزريبه وماحدش يعرفلك طريق جره
> أسمعى الكلام وبلاش شغل الجواميس ده علشان لسه حعلمك الكلام الحونين
> أوعى تجيبى سيره لحد ..لما نشوف آخرة المشى وراكى أيه ..سلام
> يخييبك ست عن دون الستات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
amrmoonlight
دراع المعلم اليمين
دراع المعلم اليمين
avatar

عدد الرسائل : 110
العمر : 28
تاريخ التسجيل : 28/01/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الإثنين مارس 02, 2009 5:25 pm

الله عليكى يا شجرتى
بس انا مبسوط النهارده اوى فى ام زكى يا رب الحلقه الجايه يعدموها فى ميدان عام
هههههههههههههههههههههههه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
heba_cool02
دراع المعلم اليمين
دراع المعلم اليمين
avatar

عدد الرسائل : 1012
العمر : 29
تاريخ التسجيل : 25/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الثلاثاء مارس 03, 2009 11:24 am

انتى المفروض بقى تكتبى قصص وتنشريهااااااا
بجد القصة جامدةةةةةة موتتتتتتتتتتتتتتت
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الثلاثاء مارس 03, 2009 4:01 pm

amrmoonlight كتب:
الله عليكى يا شجرتى
بس انا مبسوط النهارده اوى فى ام زكى يا رب الحلقه الجايه يعدموها فى ميدان عام
هههههههههههههههههههههههه

هههههههههههه

حرام عليك ياعمرو

دي حته ست لذيذه وكلها خيرررررر

بس احب اطمنك ان اخرتها زي الفل

تااااابع وانت هتشوف
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الثلاثاء مارس 03, 2009 4:03 pm

heba_cool02 كتب:
انتى المفروض بقى تكتبى قصص وتنشريهااااااا
بجد القصة جامدةةةةةة موتتتتتتتتتتتتتتت

ههههههههههه

ربنا يخليكي يا هوبه ياااارب

وانا حاسه ان ام زكي عجباكي اوووووووي زيي بالظبط

ستات ناصحه يا هوبه والله والنبي ما لينا الا بعضينا lol!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
شجره الدر
دراع المعلم اليمين
دراع المعلم اليمين
avatar

عدد الرسائل : 1683
العمر : 30
الموقع : i believe i can fly..i belive i can touch the sky
تاريخ التسجيل : 28/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الثلاثاء مارس 03, 2009 4:05 pm

الحلقة رقم 12


بخاطرها بعد التعيلات

البت بخاطرها مشيت على الوصفه وكل يوم تدخل الحمام تدعك فى جتتها وتغسل فى راسها لحد ماجسمها يشروب دم وكانت النتيجه أن البت أبيضت وشعرها نعم وبقيت زى الفل وجاتنى فرحت بيها قوى
> كده أنتى بقيتى تمام التمام بعد ماشيلتى البلاوى أللى على جتتك أستمرى كده على طول وما تقعديش فى الشمس
> ماشى ياخاله ندخل على الخطوه أللى بعد كده
> دى بقا عايزه مشوار للبندر أنا وأنتى علشان أنقيلك كل حاجه بمزاجى
> خلاص يوم الجمعة نستأذن من العمده نروح البندر
وجه يوم الجمعة وقلنا للعمده مارضيش يوافق ألا لما يبعت معانا خفيره خصوصى ووصاه
> واد يا عويضه النسواين أللى معاك أمانه فى رقبتك ياوله عينك ماتروحش كده ولا كده وخصوصا مع الوليه أم زكى لو حاولت تهرب طخها وريحنا منها وهات التانيه وتعال وياريتك تتطخ الأتنين يبقى عفارم عليك
الواد عويضه الخفير ماشى ورانا وشويه حيحط ماسورة البندقيه فى ظهرى ولا كأننا أسرى رايح يسلمهم
القصد.. بخاطرها زغرت له حتت زغره وحلفت أنه يمشى بعيد عننا وألا حتخطف البندقيه وتخلص عليه..لولا كده ماكان حيتلم
دخلت بيها على محل بيبيع قمصان النوم الحريمى أللى بتشف وبترف وأختارت ليها سبع أطقم كل طقم لون
بخاطرها : مش كتير كده ياخاله
> مش كتير أنا عايزاكى كل يوم تلبسى طقم علشان تهبلى العمده
> بس دا خفيف جوى ياخاله ومسخره خالص ما عرفش أمشى بيه فى الدار ولا حتى أجعد بيه قدام الفرن
> ياخيبك يابعيده أياكش جايبين الأطقم دى علشان تقعدى بيها قدام الفرن وتحلبى بيها الجاموسه..الهدوم دى تلبسيها جو أوضتك بس وأوعى حد من الستات يشوفك بيهم ليعملوا زيك وتبوظ الشغلانه
> حاضر يا خاله بس مايصين جوى ياخاله وعريانين أنا أتكسف ألبسهم قدام العمده
> تتكسفى من أيه يا عبيطه دا حيفرح بيكى قوى..مش جوزك يابت زى ماهو جوزنا كلنا.. وحياتك أنا عندى قدهم عشر مرات فى مصر كل طقم وطقم يضرب أخوه على عينه وياريته تمر فيهم أللى تجنن وأللى هرب وأللى مات وآدى أخرة نصيبى مع عمدتكم الجعر
> شوفى ياخاله نتفق على أتفاق أنتى تعلمينى كل حاجه وأنا أخلصك من العمده
> أتفقنا ..تعالى نشترى شوية مكياج
> أحمر وأبيض وذواء.. أهو ده أللى ناجص
> أحنا قلنا أيه نسيتى الأتفاق ..سيبلى نفسك ومالكيش دعوه
أشتريت لها طقم مكياج كامل وشوية برفانات على مزيلات عرق والباقى أنتى عارفاه وجيبنا بعضيتنا ورجعنا على البلد وتانى يوم جت بخاطرها الأوضه وهى ملحوسه وشها بالروج والألوان بقيت عامله زى البلياتشو
> كده كويس ياخاله
> قومى يابت أغسلى وشك وتعالى أنا أعلمك..حد شافك بشكلك المقندل ده
> الأستاذ إبراهيم أبن العمده الكبير شافنى وهو نازل رايح الشغل ضرب أيده على صدره وقعد يضحك وقعد يهز فى راسه وسابنى ومشى وكل شويه يبص وراه ويضحك ..هو بيضحك على أيه ياخاله
> أقعدى قدامى ونشفى وشك كويس وأمسكى المرايه دى فى أيدك ..توكلنا على الله وأيش تعمل الماشطه فى الوش العكر
> أنتى بتشتمينى يا أم زكى ..طب والله ما أنا جاعده
> أقعدى بس لما أظبطلك حواجبك أللى عامله زى المقشات دى
وحياتك يابت ياقشطه قعدت تحت أيدى تلات ساعات لما خليتها مابقتش مصدقه نفسها وقامت قايمه نازله فى بوس
> فهمتى أزاى تحطى المكياج حتجيلى كل مره أمكيجك كل ما العمده يجيلك لحد ما تتعلمى تعملى المكياج لوحدك ..البت كانت أروبه أتعلمت كل حاجه فى قعدتين تلاته ونفذت الكلام أللى علمتهولها وأطقم الحنيه عملت شغل جامد معاها قوى والبرفانات وأطقم النوم البت أتنقلت ناقله جامده .. وعمك العمده كل يوم عندها لدرجة أنه مابقاش طايقنى ولا طايق نسوانه الأتنين ..
وفى يوم لقيت خضره ومسعده نسوانه الأتنين قاعدين بيتوشوشوا.. قلت أكيد فيه مؤامره بيدبروها..فقمت داخله عليهم
> أنتم مالكم ياستات قاعدين روسكم فى روس بعض ولوك لوك هو فيه أيه
>أقولها يا مسعده ..لأ ياخضره
> قولى يابت ياخضره فيه أيه
> حقولك يا أم زكى أهو أللى نانبنا نابك وأنتى بقيتى واحده مننا ..البت مسعده عايزه تعمل عمل عند الشيخه صفيه علشان العمده يكره البت بخاطرها ويرجع لنا تانى
> يرجعلكم أنتوا الأتنين.. أنما لو حتعملوا العمل يبقى تعملوا ليا واحد عشان العمده يطلقنى وأرجع بلدى
> ما أنتى قاعده معانا ياخاله أنتى مسليان على الهم أللى أحنا فيه
> لا ياحلوة أنتى وهى أشبعوا بيه أنا ألف مين يتمنونى فى مصر..شوفوا حتروحوا أمتى وأروح وياكم
> الشيخه حتيجى بنفسها لحد هنا بس لما العمده يسافر





الحلقه رقم 13




الشيخه صفيه


يسافر العمده وتحضر الشيخه صفيه للدوار ويتم عقد الجلسه فى أوضتى ..وليه شكلها يخوف يابت ياقشطه لفه راسها بأيشارب أخضر ولابسه عبايه بيضاء وشايله خورج وأول مادخلت بصت ناحيتى وقالت لى: أزيك يا أم زكى يابنت بديعه
أنا جسمى شال منها أزاى الوليه دى عرفت أسم أمى أكيد مكشوف عنها الحجاب
صفيه : هاتوا لى أى هدمه من بتوع العمده بس يكون عرقان فيها
(قامت مسعده جرى وراحت جابت فانلة العمده وحطتها أمام الشيخه )
قامت الوليه الشيخه قامت واخداها وقالت :سبيها معايا وبكره حتلاقيها تحت مخدتك ( وقامت مولعه البخور وقعدت تعزم عليها وتتنفض وتملس على وش مسعده شويه وعلى وش خضره شويه وهى بتقول الحسن الحسن الدمال الدمال ياخالج من الفسيخ شربات يامصور الجرد غزال نادتكم تحضروا يا أسيادى
قلت حسن أيه وجمال أيه ده..دولت ولا ينفع فيهم ستين عفريت مش شايفه خلقهم المشرفطه
شخطت فيه وقالت : أخرسى أنت للأسياد تسخطك جرد بصديرى مش كفايه الرجاله ما بيعشوش معاكى وقدمك نحس عليهم
> كلامك مظبوط يا ستنا الشيخه ألا العمده لازق فيه مش عارفه أخلص منه
> لأنه نجمه راكب على نجمك ومش حيفوتك ألا لما يرزعك العلقه المتينه وبكده نجمه يفوتك فى حالك وتتطلقى
> طب ما عندكيش حاجه تبعده عنى من غير عولق ولا بهدله أنا جتتى مابتستحملش
> علقه تفوت ولا حد يموت ياوليه ..وأللى أقدر أعمهولك أن أخلى ميعاد العلقة يكون بدرى شويه
> أمتى يعنى ياست الشيخه
> فى ليلة القمر لما يكتمل جهزى نفسك وأنتى ياخضره خدوا الميه دى رشيها قدام أوضة بخاطرها وبخروا كل يوم أوضكم وتحطى نقطه واحده من القزازه دى فى كوباية الشاى بتاعة العمده لما يدخل عندك وتجيبوا طلبات الأسياد لعمل حجاب المحبه أنما أنت يا أم زكى مش عايزه منك غير ديل خنزير أعرج ما دخلش دنيا

مسعده : الطلبات دى كتير يا شيخه صفيه خروف بقرنين وعشر فرخات وديك رومى وبخور وأتنين جنيه دهب حنجيب الهم ده كله منين
> تجيبيه من الزريبه وعشة الفراخ يامسعده يابنت نفوسه وما تلوكيش كتير ألا الأسياد تسمعك وتشرفط وشك أكتر ماهو متشرفط
وأنا ياست الشيخه حجيب منين ديل الخنزير الأعرج أللى مادخلش دنيا
> مالكيش دعوة هاتى 50 جنيه وأنا أتصرف
> بس أنا ماعييش فلوس هنا ..حالى ومالى كله فى مصر
خضره : ماتشليش هم يا أم زكى حندفعلك أحنا المهم يكون بنتيجه
الشيخه : السلام السلام أنصرفوا يا خدام الجان طلباتكم مجابه بأذن الله..بكره أبعت ليكم مرسال ياخد الطلبات وعلى آخر النهار يكون عندكم العمولات حي حي حيييي
وتقوم الوليه النصابه ونقعد سوا نفكر فى الكلام وندبر فى الطلبات
وتانى يوم ييجى المرسال ومعاه لكل واحده فينا حجاب متبطن بحتت قماش وكان حجابى ياختى متخيط فى قماشه سوداء وأحجبتهم فى قماشه حمراء ستان ..وريحة الحجاب بتاعى معفنه ما يطقهاش أنسان
> شممينى يابت يامسعده الحجاب بتاعك ..ريحته حلوه ومفهوش حاجة أومال حجابى ماله معفن ليه
مسعده : حجابك يا أم زكى للكره والفراق أما حجابنا للمحبه أنت ناسيه ولا أيه
أخدت الحجاب وأنا قرفانه ياحبيبتى ومش طايقه ألبسه قمت رمياه فى الدولاب قولت بلا قرف وقتها يبقى يحلها ألف حلال




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
hamada swastika
مساعد صبي القهوه
avatar

عدد الرسائل : 35
العمر : 28
تاريخ التسجيل : 08/01/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأربعاء مارس 04, 2009 1:53 am

جميل اوى اوى يا شجره
ومستنين الحلقه 14
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
heba_cool02
دراع المعلم اليمين
دراع المعلم اليمين
avatar

عدد الرسائل : 1012
العمر : 29
تاريخ التسجيل : 25/07/2008

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأربعاء مارس 04, 2009 12:43 pm

الحلقة جامدةةة موتت يا شجرة ومستنية اشوف الحجاب حيعمل اية
عشان لو نفع اعمل حجاب عند الولية دى يمكن اجيب عريس
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
zizo
دراع المعلم اليمين
دراع المعلم اليمين
avatar

عدد الرسائل : 240
العمر : 25
تاريخ التسجيل : 08/02/2009

مُساهمةموضوع: رد: يالليله كومييييييييدي (((( يوميات ام ذكي)))) في قصه الحي الشعبي   الأحد مارس 08, 2009 4:03 pm

بجد بجد القصة 100\100


ومستنى باقية الحلقات


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
يالليله كومييييييييدي (((( يوميات ام ذكي)))) في قصه الحي الشعبي
الرجوع الى أعلى الصفحة 
صفحة 2 من اصل 3انتقل الى الصفحة : الصفحة السابقة  1, 2, 3  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
قهوه انح :: Anna7wyyy 3la tooooool :: افتكسااااااات انح-
انتقل الى: