الحلقة رقم (14)
حجاب المحبه
ويمر يومين ويرجع العمده من السفر وييجى الليل ويدخل أوضة البت بخاطرها
عشان ينام وأحنا التلاته قاعدين فى المندره زى الكوبب مستنيين النتيجه ..وحياتك مفيش ربع ساعه خرج العمده من الأوضه وهو بينادى على خضره..فقامت تجرى زى الرهوان..أمرك ياسيد الرداله
> أنا حبيت عندك النهارده يابت جهزى الفرشه
ألا والبت مسعده قامت مزغرطه وهيه مبسوطه من مفعول العمولات ومخبيه وشها لأحسن العمده يشوفها ..
العمده : مين أللى بيزغرط ياحرمه أنتى وهيه
> الزغاريط جايه من بره ياجناب العمده
> فال خير أنشاء الله ..أشهلى يابت ياخضره عايز أنام
وشويه لقيت البت بخاطرها داخله علينا بقميص النوم الشوفتيشى وهى موطيه راسها
> مالك يا حزينه مكتومه كده ليه
> مش عارفه العمده جراله أيه مش طايقنى أول ماحط جسمه على السرير فط زى مايكون حاجه لدعته وقام قايم لطعنى بالكف على جفايه وساب الأوضه
> معلش يا بخاطرها بتحصل مع أحسن الرداله
ومفيش ربع ساعه لقينا العمده خارج من أوضة خضره وبينادى على مسعده ..
> جهزى أوضتك يابت أنا جاى أبيت عندك
وشويه جائت خضره ودمعتها على خده وأتكومت جنبينا
> مالك ياخضره بتعيطى ليه..ضربك على قفاكى
> آه ..عرفتوا أزاى..هئ هئ هئ كركركر
وهمه خمس دقايق ولقينا البت مسعده خارجه تجرى من الأوضه وهى بتصرخ
> مالك يابت أيه أللى جرى..ضربك بالقفا
> ياريت ..ده نزل فيه تلطيش لما عمانى من الضرب أقوله أضرب فى أى حته ألا الجفا وهو يزيد.. فى الأخر ومن كوتر الضرب قمت عضااه فى أيده وأهو متلقح جوه ..العمده أتجنن ياولاد
قلت بس عليا الدور أكيد العمولات بتاعة الشيخه فيها حاجه غلط قومت قايمه على أوضتى ومطوحه الحجاب المعفن من الشباك..إذا كان حجاب المحبه آخرته ضرب بالقفا أومال حجاب الفراق حيحصلى أيه.. أكيد حيفرومنى
بصيت لقيت العمده داخل مدلدل ونفسه مكسوره ياحبة عينى
> شوفتى يا أم زكى النصيبه كل مادخل أوضه من أوضهم يحصلى أيه
> معلش ياخويا تلاقيك بس تعبان ومرهق من السفر أقعد لما أعملك كوباية عناب تروق بيها دمك
> أنا دمى مش حيروج ألا لما أعرف أيه أللى بيحصلى ده ..أنا جمعة البسطاويس عمدة كفر بسطا يحصلى كده..لع وألف لع
> ماتلعلش ياخويا كده لا يطقلك عرق.. النهار ليه عنين بكره روح أكشف عند الدكتور بتحصل كتير ماتشلش هم حتبقى كويس
> دكتور ياولاد الأبالسه طب سبينى أنام وليكم معايا صرفه ياولاد الفرطوس
العمده يحط دماغه على المخده ويروح فى سابع نومه ويشخر شخير عمرى ماسمعته قبل كده ..قمت قافله عليه الأوضه وخارجه
مسعده :أيه يام زكى ضربك برضو
> ياريته كان ضربنى أهو متلقح جوه وشخيره واصل للجو ..قومى ياختى علشان أنام فى أوضتك بدل من وابور الطحين أللى شغال جوه ده تتكم القرف فى مناظركم..مش عارفه الراجل التحش ده مجوزكم على أيه
مسعده بجوار أم زكى على السرير: بجول أيه أكيد الوليه الشيخه ضحكت علينا
> ضحكت عليكم أزاى ..إذا كان العمده طفش من عند بخاطرها ..قولى ممكن تكون زودت العيار حبتين خلت الراجل مش طايقنا كلنا منها لله ..بس أنا طوحت الحجاب بتاعى من الشباك
> عشان كده البهايم نازله ضرب فى بعض وكسروا الزريبه
> نامى يامسعده نامت عليكى حيطه ..آدى شورتك المهببه ولعت فى البيت بنسوانه وبهايمه
الحلقة رقم (15 )
يااالطيف
> مالك ياعمده مش عوايدك ..أنت عيان ياراجل
> أسكت يا شيخ البلد ياواد عمى أنا مش طايق نفسى ..أنا جمعه البسطاويسى عمدة كفر بسطا يجرالى كده مش عارف أنام زى خلج الله كل مادخل عند أى حرمه من حريماتى نفسى تسد وأقوم نازل فيها ضرب..مش عارف أيه اللى بيحصلى
> بس بس كده أنا فهمت ليه الوليه الشيخه كانت عندكم من يومين بتعمل أيه؟؟
نسوانك عملوا لك عمل ياعمده عشان يكسروا نفسك ويمرمطوا راسك فى الطين... فاكر الواد أبن يوسف الضوى لما الوليه دى سحرته يوم دخلته وفضل مربوط عن عروسته أسبوع لحد مالقوه شانق نفسه قى شجرة دارهم
> يا ولاد الأبالسه ودين وما أعبد لنا شارب من دمهم قبل ما طلقهم
> مش هو ده المهم يا عمده ..أمر ومفروغ منه الحرمه أللى تعمل كده فى راجلها تستاهل الحرق ..أنما العباره فى أزاى ترجع تبجى كويس تانى هو ده المهم وألا حتبجى مجلدة البلد بعد ما ستاتك ينشروا الخبر بأنك لا مؤاخذه بجيت طنبوشه وقليل ما شالوك من العموديه
> يانهار مش فايت طنبوشه.. يعنى أيه طنبوشه..هات ودنك لم أقولك ...يه يه دبرنى ياواد عمى شرف عيلة بسطاويسى حيروح
> شوف ياجمعه ياخويا أول أمر نبعت نجيب الوليه أللى أسمها الشيخه صفيه
ونقررها مين فى نسوانك الأربعه أللى عمل فيك كده..تانى هام تفكك من السحر وترجع زى الأول تالت هام تغير عتبتك وتطرد النسوان دى بره وتطلقهم وتجوز جوازه جديده لتثبت للكل بأنك حى على الفلاح وياريت تكون واحده بتخلف عشان تجيبلك عيل يفرسهم ويرفع راسنا
> هو أنا ناجص عيال
> ياسيدى الدار واسعه والعيل أو العيله أللى ربنا حيرزجك بيه هو أللى حيثبت أنك تمام التمام وكل حى يحط بلغه فى خشمه
> كلامك زين ياواد عمى برغم أنه ماسخ على قلبى ..تعال ياواد ياعوضين خد معاك أتنين غفر وتجبولى الوليه أللى أسمها صفيه من تحت طقاطيق الأرض
> حاضر ياجناب العمده بس بلاش أنا دى وليه واعره جوى ..بعدين تسحرلى وأنا لسه عريس
> غور من جدامى ياغفير الشوم جبر يلمك.. تعمل أللى بجولك عليه الوقيتى
> ألحق ياجناب العمده الشيخه أهه داخله على الدار ..بسم الله الرحمن الرحيم سلام الله من قول رحيم ...مش قولت لجنابك دى وليه واعره وواصله
الشيخه صفيه : طول ما أنت جاعد بتسمع لكلام شيخ البلد ما نتش نافع ياعمده
شيخ البلد : عن أذنكم قايم أصلى العصر
العمدة : أجعدى يا ستنا الشيخه ..تشربى أيه
> مش عايزه حاجه ..فيه أيه أنت كنت عايزنى ليه
> تشوفى لى حل فى النصيبه أللى أنا فيها
> حتشوف طلبات الأسياد ...تحت أمرك وأوامر أسيادنا بس ليه طلب ياستنا عايز أعرف مين من الستات عمل فيه كده
> ياجمعه يابن نظيره مش دخلك وربك حليم ستار المهم تبقى كويس وماتسألنيش تانى عشان ما تزعلش الأسياد منك ..خد أشرب شوية الميه دول وبكره حتبجى كويس لما تجيب الطلبات على العشه بتاعتى..
> أوامرك مجابه ياستنا الشيخه
وقامت من عند العمده وراحت لحالها وتانى يوم جابنا أحنا الأربعه وحطنا قدامه
وقعد يقرر فينا أن واحده مننا تتكلم أبدا
> مش عايزين تتكلموا..أنا بجا حخليكم تنطجوا ياولاد الـفرطوس..هات ياولد الكرباج ونزل فى التلات نسوان ضرب لما هراهم وأنا واقفه بعيد وأنا بترعش
الحلقة الأخيره
عريس الغفله
> أنتى بقا يام زكى ماينفعش معاكى الكرباج لأنك من البندر خبطه واحده حتخلصى أنما دوكهم جتتهم نحست وواخده على كده.. بس أنا حعزبك بطريقة تانيه خالص
العمده يابت كان زرع بدرى عليه كف زى المرزبه سحبنى من قفايا وراه ودخل المنحل وربطنى فى شجره ودهن وشى وأديا ورجلى عسل ومشى وقعد يتفرج عليا من بعيد.. وشوفى بقا أى حاجه طايره تقررص فيه دبان على نحل على دباير على ناموس على بلى أزرق لحد ماجسمى ورم وأنا بصوت ولاحد سأل فيه.. فكونى بالليل وحطونى فى السرير وجسمى ووشى أتفخوا زى فردة الكاوتش وبقت عينى مكان مراخيرى وبوقى مش عارفه راح فين والعمده كل مايبصلى يموت على نفسه من الضحك
قعدت عيانه أسبوع وآخد فى حقن وبرشام وجسمى أتنقرش زى كحك العيد لحد ما أتعدلت ودخل عليا العمده بالليل وقالى : بجيت كويسه دلوقتى يا أم زكى
قولت : آه الحمد لله ..قالى : أمضى هنا أنك قبضتى مؤخرك ..وروحى وأنتى طالقه.. والدهب والصيغه هديه منى ليكى والصبح مش عايز أشوف وشك الفجرى فى الدار نحستينا الله يجازيكى
> ومضيت ياختى وقولت أنفد بعمرى
قشطه : ياه دا أنتى أتبهدلتى قوى يا أم زكى والنبى صعبتى عليا
> ما يصعبش عليكى غالى ..ألا قوليلى دوخلتك أمتى يابت
> يوم الخميس الجاى
> يوم الخميس الجاى متأكده ..ألا متأكده ..ياخساره مش حبقى فاضيه
> عندك أيه يشغلك يا أم زكى
> أصل فيه عريس متقدم لى ويمكن نكتب الكتاب يوم الخميس
> تانى مش كفياكى جواز ياوليه
> دى آخر مره وحعتزل بقى وأعمل ماتش أعتزالى بالعريس الجديد بس أيه مأمور ضرايب قد الدنيا وعنده عربيه أمريكانى هواها يرد الروح وفول أوبشن..وتوماتيكى وفيها تلاجه وسخان وبوتجاز أربع عيون وتليفزيون وكتشن ماشين عربيه أوضتين وصاله وعفشة ميه محندقه على قدنا وشبابيكها كلها على الشارع وعامل فيها فتحه فى السقف وفتحه فى الأرضيه عشان أدلدل منها السبت.. وحنقضى شهر العسل فيها وبعدين حيطلع بينا على جمصه وأسمه لطيف وهو لطيف
> وأتلميتى عليه منين ده يا أم زكى
> كان قاعد على قهوة كتكوت وعمال يعاكسنى فى الرايحه والجايه ويقولى : ياجميل ياقمر أنت.. أموت أنا فى المفرمه ..قولت وماله نفرموه ونخلصوا منه ونورثوا منه العربيه ونأجروها مفروشه
وهو ده أللى حختم بيه ياهو يختم بيه
>يااالطيف
وكده اقدر اقول لكم ان حدوته ام ذكي خلصت ويااااااااارب تكون عجبتكم
واسفه علي التأخيررررررررر ده كله
واشوفكم في حدوته جديده قريب
موضوع: رد: يالليله كومييييييييدي (((( يوميات ام ذكي)))) في قصه الحي الشعبي 
الإثنين مارس 23, 2009 4:27 pm
