لازم كلنا نصلي صلاه التراويح..بتسئل ليه؟؟ تعالي وانا اقولك

ازيكم يا اجمل اعضاء

كل سنه وكلكم بخير وطيبين يارب

النهارده حبيت افتح معاكم موضوع صلاه التراويح بأختصار وبسهوله اوي وحاولت اني اكتبه بأسلوب مبسط ومفهوش تعقيد خالص وحاولت اخليها علي هيئه س...ج

لاني بصراحه سمعت ان في ناس مش بيصلو صلاه التراويح واللي هي تعتبر سنه عن حبيبنا

وبجد زعلت اوي لان اجر الصلاه دي في رمضان مش بيتعوض في اي يوم تاني

دلوقتي انا متوقعه حد هيسئل سؤال

ليه سموها صلاه تراويح؟؟؟ هجاوبك يا سيدي

التراويح دي كلمه جمع ومفردها ترويحه (اللغه العربيه بردو بتنفع يابتوع محو الاميه )

وسموها بالاسم ده لان زمان لما كانو بيصلوها كانو بيستريحوا بين كل تسليمتين

طيب حد تاني هيسئلني ويقولي وانتي عيزانا نواظب علي صلاتها ليه؟؟

هقولك لان الرسول صلي الله عليه وسلم كان بيحث الناس انهم يقيموا الليل ودي كانت سنه

عن الرسول والدليل علي كده لما قال في الحديث

من صام رمضان إيماناً واحتساباً غفر له ما تقدم من ذنبه

طيب واحد هيقولي ودي بنصليها امتي؟؟؟

دي انت ممكن تصليها من بعد صلاة العشاء إلى طلوع الفجر

وبيفضل انك تصليها اخر الليل ومش في اوله لكن لو مش هتقدر
(ان الله لا يكلف نفسا الا وسعها)
وممكن تصليها بعد العشاء زي ما بنصلي في المساجد

طيب ودي نصليها فين وازاي؟؟

هنا بقي وزي ما انا قريت في كتاب السنه
ان في اختلاف في الاراء
في منهم اللي بيقول ان الافضل تصليها مع الجماعه في المسجد

وفي منهم بيقول انك تصليها في البيت واستشهدوا علي كده بالحديث اللي بيقول

أفضل صلاة المرء في بيته إلا المكتوبة

طيب ودي كام ركعه؟؟؟

دي 11 ركعه ممكن تصليهم كل ركعتين وتريح شويه ممكن في الشويه دول تسبح

او تقرا (قل هو الله احد ) 3 مرات لانك بقرايتها 3 مرات كأنك قريت القران كله

وانا قريت كمان حديث عن الرسول بيقول

( إن أطالوا القيام وأقلوا السجود فحسن وإن أكثروا السجود وأخفوا القراءة فحسن، والأول أحب إلي)

يعني بمعني اصح ...الافضل انك تزيد من قراءه السور ولازم تكون سور كبيره مش سور صغيره

طيب انا دلوقتي مش حافظ سور كبيره؟؟

لو مش حافظ ممكن انك تصليها في جماعه افضل
و ممكن تقرا من المصحف وانا عن نفسي بعمل كده وده بيخليني اختم القران اسرع وهيساعدني اني اختمه مرتين او اكثر ان شاء الله

طيب هنعمل ايه؟؟؟؟

تجيب مصحف صغير خالص وتمسكه في ايدك وتقرا منه وتقفله وتسجد وتركع بيه عادي جدا

بس المهم انك لما تسجد في الارض متخليش المصحف يلمس الارض

فممكن تحطه جمبك علي اي تربيزه بهدوء خالص علشان متفقدش خشوعك في الصلاه

وحاول انك تقرا صفحه او صفحتين من المصحف في كل ركعه (او ما تيسر لك انك تقراه)

انا عارفه اني طولت عليكم اوي اوي اوي

لكن بجد صدقوني انا قريت المعلومات دي في كتاب وحاولت انفذها وكتبتهالكم بصوره
مبسطه علشان كلكم تستفيدوا منها

وربنا يتقبل مننا كلنا يارب

وياريت تدعولي وتدعوا لجميع موتي المسلمين

انا بشكرك جدا ياشجره الدر على موضوعك ده
انا الحمد لله بصلى التراويح بس بفضل انى اصليها فى البيت

شكرا يا شجره علي معلوماتك القيمه دي
يارب تقبل منا صلاتنا وصيامنا

صح يا شجرتنا احنا لازم نصلي الترويح ونلتم بشكل عام في رمضان وكفايا الذنوب الي احنا عملنها في بقيت السنا
ربنا يهدينا ويثبتنا

شكرا يا شجرة
مع انى بحس انها تقيلة شوية بس انا ناوى اصليها ان شاء الله

ربنا يعينكم كلكم يارب وان شاء الله تقدروا تصلوها وتدعولي Wink

انا اول مرة اصلى التراويح كان رمضان دا وطلعت صلاة جميلة اوىىى والحمد اللة