عدد الرسائل : 1929 العمر : 37 تاريخ التسجيل : 25/07/2008
موضوع: عملت دماغ قبل كده ؟ تعالى شوف الدماغ دى الثلاثاء سبتمبر 02, 2008 10:23 pm
معملتش دماغ قبل كده ؟ طيب تعالي بس المرة دى مش اي دماغ دي اسمها ( دمــــــــاغ نـــاس ) ايـــــه دماغ ناس دى ..؟؟
بص ياسيدى ..
لو فى يوم لقيت نفسك متضايق ومخنوق وملكش نفس تكلّم حد ومش لاقى حاجه تعملها .. إنزل الشارع إتمشى لواحدك و تأمّل فى الناس .. هتلاقى الموضوع مسلّى جداَ .. الشعب المصرى ده لذيذ طحن .. دماااااااااااااااااغ
* هتلاقى ناس طالع عيننهم فى أتوبيس فيه 186 واحد والناس طالعين من الشبابيك والجو حر .. والناس لسّه بتركب وهى مبتسمه وحاسه بالكفاح ..
وتلاقى واحده ست تخينه – غالباَ موظفة – دخلت وسط الـ 120 واحد اللى واقفين على الباب واخترقت الجموع فى براعة ورشاقة تحسد عليها .. سبحان الله
* بنت لابسه هدوم المدرسة ومزوغة ماشيه مع ولد – ممكن تحلف إنه مش هيلاقى شغل ولا بعد 100 سنه من شكله – وإن لقى.. أول حاجه هيعملها أنه يسيب البنت دى .. كفايه فقر بقى ..
* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان
ومش عايزين حاجه تانيه من الدنيا ..
* واحد شكله تعبان طحن ومش لاقى ياكل، بس جايب أحدث " الموبايل " وبيتكلم فيه بصوت عالى فى وسط الشارع.. عشان هو حر ..
* واحد عمره ما شاف الزبدة فى حياته ولا يعرف بتستخدم فى أيه أساساَ .. عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية .. قلهم " أه طبعاَ انا مع المقاطعه دا واجب وطنى يا جماعه أنتوا بتتكلموا إزاى .. "
* واحد واقف مع خطيبته/صحبته قدام قفص الأسود فى جنينه الحيوانات بيقولها : " بصى .. أهو ده بقى أسد .. !!! "
شاعراَ بأنه قد منحها العلم والمعرفه المطلقة وأسرار الكون ..
* من شهر كده كده كان فى ماتش للأهلى و فريق تانى يطلق عليه البطاطس التونسى .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى ..
موضوع: عملت دماغ قبل كده ؟ تعالى شوف الدماغ دى 
الثلاثاء سبتمبر 02, 2008 10:23 pm
