ذكريات الطفوله!!!!""" دي فضيحه"""!!!

هاااي شله... بصوا دي فكره لذيذه اوي ... هي ان كل ميمبر يحكيي لنا على موقف حصله و هو\هي طفل\ه

__ موقف مضحك _


_موقف محرج _


__ المهم يكون و انت\ي طفل\ه

و انا هبدأ و احكيلكم على موقف حصلي انا و اخويا و احنا صغيريين
بصوا كنت انا و هو في البيت باليل لوحدنا_ والدي و والدتي كانوا بره
المهم كنا بنتفرج على التي في
و مستمتعين باللي كنا بنتفرج عليه و بناكل فشاااار
و اخويا-اكبر مني بتلت سنين-
حب يعمل فيا مقلب
عمل اييه؟
اقولكم عمل ايه

عمل فيها ميت

فجأه كده لقيته بيقوللي بصوت مبحوح: اميييره كح كح -- و حاطط ايده على قلبه و عمال يكح....و بيكتم نفسه
و عماال يقوللي: امييره انا خلاص هموت يا امييره... خلي بالك من الألعااب و الفلوس اللي محوشها خديها ليكي ... و فجأه لقيته وقع نفسه من على الكرسي و و قع في الارض و اتسطح و عمال يكح و بيقول اااه بمووت خلاااااص...
انا في الاول كنت بضحك ببراءه و بحسبه بيهزر و عماله اقوله بطل هزار
بس لما وقع انا اخدته في حضني و فضلت اقوله ماتسيبنييييش يا حماده _متأثره بالمسلسلات بأه _ و الله يجازيه سكت فجأه و بحلق في السقف و كتم نفسه
انا هنا بأه فضلت اعيط بهدوء و اقوله حماااااده قوم يا حمااااااده بطل هزااااااااااااااااااار و اعيط
و هو الدزمه ممثل عبقري
و بصيت كده من الشباك... كان يومها القمر بدر....
لقيت القمر وش بيضحك .... فضلت دموعي عماله تنزل و انا بصه للقمر
و لقيت حماده قام بص عليا ... اتخض اني ساكته

انا اتفاجئت و قولتله ايه ده انت مامتش؟ فضل يضحك و قاللي لا و باسني و مسح دموعي
و نزل جابلي حاجات حلوه منها جوليو و اللبان السحري
اه سابني لوحدي و نزل

و على فكره من يومها و انا بشوف البدر وش بيضحك

و اللي يضايقني دلوقتي في الموضوع::: ان الفلوس اللي في حصالته راحت عليا

Princess كتب:

و اللي يضايقني دلوقتي في الموضوع::: ان الفلوس اللي في حصالته راحت عليا

اصيلة من يومك يا اميرة

المهم
انا بقه يا ستى كنت بعمل حركة كتير اوى
كنت استنى الاسرة كلها اما يتجمع ويتفرجوا على التليفزيون واروح على المطبخ وافتح زراير البوتجاز كلها واستخبى تحت السرير
ومفيش تلات دقايق وريحة الغاز تملى الشقة والاقى كله بيجرى فى البيت وبابا بيجرى يقفل البوتجاز واخواتى يجرو تحت العمارة والبيت يتقلب كله
وانا اضحكككككككككك
بس ببطل ضحك اول ما بابا بيجبنى من تحت السرير عشان بترن علقة محدش خدها قبل كده

جميل يابرنسيس الموضوع ده,
انا بقي كنت بحب بابا يشيلني_ ولحد دلوقتي اكيد _احم ...المهم فكان عشان يهرب مني يقولي انا ضهري بيوجعني مش قادر فانا كنت اقله خلاص شيلني وانا هدعكلك ضهرك فكان هو يشيلني وانا طول الوقت اطبطب عليه !
دا شاف مني حاجااااات ولسة ...يتبع

ههههههههههههههههههههههههههه

ايه يا اميره اللي حصل ده بقي اخوكي قام روحتي انتي سألتيه بكل سزاجه
ايه ده انت مموتش هههههههههههههههههه
بعدين انت من ايام اللبان السحري هههههههههههه !!!!!
و انت يا نور كان هزارك بايخ اوووووووي مع العيله
كويس انك مخلعتش الانبوبه وحطهالهم في الاوده معاهم
وانتي يا حدوته طول عمرك متعبه حتي في طفولتك

انا كانت طفولتي مختلفه شويه

انا فاكر مره كنت في الحضانه طفل بقي صغير
كنت طفل هادي اوووووي
المهم المدرسه بعتت ليهم في البيت قالتلوهم تعالو الحقو ابنكو
مبيتكلمش مع حد خالص بيبص بس المهم جم المدرسه
وبعد كده بابا اتكلم معايا شوبه
بعدها بكام يوم المدرسه بعتتلهم في البيت برضه قالتلهم تعالو الحقو ابنكو
مش عاوز يبطل دوشه عاملنا ازعاج في الحضانه شفولكم حل فيه
هههههههههههههههههههههههه

اه كان عندي ييجي خمس سنين و كنت بستفسر برضه هههههههههههههههههههه

و نور طول عمرك بتعرف تظبط اللي حواليك

و ساره يا حنينه

و مؤمن اكيد مشرفه الحضانه جالها البري بري دلوقتي ههههههههههههههههههههههه


ها مين كماااااااااان يحكيلنا ؟؟؟

ازيكوووا علفكره يا اميرة فكرة جامدة اووى وشكلك بتصدقى كل حاجة اما مؤمن المعلم فانت عكس الناس بس زى العسل اما نور انت تحفة اما انا فهى حكاية غريبة شويه كنا بنبيض البيت وبعد ما خاصنا فضل شوية بويا فى علبة صغيرةوكنت انا احمد اخويا فى البيت لوحدنا ووالدى ووالدتى كانو فى الشغل وبعدين حبينا نلعب فا بأن انا( الكبير) اقترحت انه يحت علبة البوياعلى دماغه وانا بالعصايا اقعد اطبل عليها "ملحوظه غطى العلبه كان عند ظهره" وفجأه لقيت احمد بيرتعش فسالتة لية ؟ من غير ما يد عليا لفلى شوفت ظهره ابيييييييييييييض والارض بقت بيضا جرينا على الحمام علشان نجيب حاجة نمسح بيها الارض واتارى رجلينا مليانه بويا وبهدلنا لماما الارض ويا عينى اخدت سجاد البيت كله للمغسله ( بس الحمد لله لخمة السجاد خلتها ممتضربناش)

هههههههههه
يا نهار "ابيض"
دا انت كنت مستبد ‎:-D‎

ها مين كمان يحكيلنا؟؟؟

بص باه ياقنحوية
انا لو حكيت على مصايب ححكى للصبح
ححكيلكوا حوار جامد طحن
مرة وانا صغير عملت فصل جامد طحن
وانا على فكرة اصغر واحد فى بيت المهم وانا كده عند 4 سنين
كنت فى بيت روحت فاتح التلاجة وروحت واخد تفاحة وروحت مستخبى تحت سرير
واقعده اكلها(حد يسالنى سؤال لولبى نزلت ليه تحت السرير حقولها عشان محدش
يقولى هات حته)
المهم الحجه اقعدت تتدور عليه فى بيت كله ملقتنيش ومجاش فى بالها انى تحت سرير
ونزلت دورت عليه فى شارع
يوميها انا فاكر الشارع كله كان بيدور عليه
لغاية مطلعت من تحت السرير والحجه اقعدت تزعقلى بس الحمد لله
مضربتش

ه انتو طلعتوووو مصاااااااايب اساسا

بصي يا ميرو انا كنت هاديه الحمد لله ومكنتش بعمل اي عمليات تدميريه وتخريبيه
بس كانت بتجيلي افكار مجنونه وانا صغيره ومازالت لغيت دلوقتي بتخيل حجات مجنونه
بس طبعا مع ايقاف التنفيذ

وفي يوم من الايام كنت بتفرج مره علي الtv وبعدين لقيت طياره هليكوبتر وطبعا سئلتهم ايه دي وشرحولي


المهم انا عجبتني الفكر اووووووووي

وخاصه ان زمان كان عندنا مروحه سقف

وطبعا اتفقت انا واخويا ان انا هطلع فوق وامسك في المروحه وهو يشغلها علي اقصي سرعه

ده علي اساس يعني اني هطير في القوضه


والوضع تحت السيطره وكله تمام وانا بتسلق علشان اطلع فوق الدولاب وانط واتشعلق في المروحه وده حسب الخطه اللي رسمناها

بس ماما دخلت وزعقت جامد عشان مش انط
علشان لو كنت نطيت كان زماني من غير راس


ده غير طبعا ان خيالي كان وااااااااااااااااااااااااااااسع اوي وانا صغيره وكنت من العيال الفشاره اوي

كنت مفهمة اصحابي اننا اربع اخوات شبه بعض
وكل يوم اقولهم انا مين فيهم

ومفهماهم اننا اول ما اتولدنا انا كنت الكبيرة
ورحت واخدة اخواتي اول ما اتولدوا
وخبيتهم فوق الدولاب (نفس الدولاب اللي بنط من عليه)
لو تلاحظوا المفروض ان انا كمان لسة مولودة ....مولوده خارقه

المشكله انهم كانو بيصدقو


بس والله كنت هاديه ومش بعمل مشاكل خالص

كنت كل لما بفكر في حاجه ...ماما بتيجي وتقفشني

my god :-D
دا احنا طلعنا كوارث

اولا اسلام انت كنت مدي اللعبه اكتر من حجمها و ادي جزاة اللي يأفور ‎
‎
‏
و شيتوس: عجباني اجابه السؤال اللولبي‎;-D شفت لو كنت بتدي اخواتك حته مكنش حصل اللي حصل
‎
‏
و شيجو رقم ١/او سمسمه :
طب ولو كانت اللي اتفرجتي عليها طياره مش هيليكوبتر؟! ‎:-D ربنا ستر ‎

‏
ها مين كمان يحكيلنا ؟؟

شجره الدر كتب:

كنت مفهمة اصحابي اننا اربع اخوات شبه بعض
وكل يوم اقولهم انا مين فيهم

ومفهماهم اننا اول ما اتولدنا انا كنت الكبيرة
ورحت واخدة اخواتي اول ما اتولدوا

ههههههههههههههههههههههههه
لا يا شجره كده وسعت منك اوووووي
طول عمرك شقاوتك فكريه عقليه

هل من فضيحه اخرى..

انا بقي كنت غاوية اخرب ستاير البيت مش عارفة لية
كنت اقصهم بالمقص او احرقهم بالبخور

تقريبا يا ساندي عقدتك سببها انك بتحبي الوقفه في الشباك
عموما انا من رأيي تركبو قبوري