احلم حلم كبير د. شريف عرفه

إحلم حلم كبير.. تكون كبير

كتابة: د. شريف عرفة


زي ما اتفقنا قبل كده.. مخنا اتبرمج طول حياتنا على حاجات معينة وبقينا بنعملها لا إراديا من غير ما نفكر إذا كانت صح ولا لأ..
هادّيك مثال:
فيه أمثال اتربينا عليها وسمعناها كتير لدرجة إنها ممكن تكون بقت ضمن برمجتنا الداخلية.. زي:
احلم على قدك!
طبعا كلنا سمعنا المثل ده.. لكن هل حد فينا فكر فيه قبل كده؟
لما تلاقي واحد أحلامه كبيرة قوي تلاقي الناس كلها اتلمت حواليه وقعدوا يقولوا ليه المثل ده على أساس إنهم بيعقّلوه وكده.. أو يقولوا ليه مثلا إن "اللي يبص لفوق يتعب" أو "على قد لحافك مد رجليك" وما إلى ذلك من النصائح...
في رأيي الشخصي، الأمثال دي كلها لازم تتلم كده ويتولع فيها.. لأنها تعتبر جرائم في حق الإنسانية!
العلم بيقول إيه؟
لازم تكون أحلامك كبيرة.. ماتحطش سقف لأحلامك.. احلم أحلام كبيرة على قد ما تقدر.. لأن حلمك كل ما كان كبير وعظيم كل ما كان دافع ليك إنك تحققه..
لما درسوا حياة الناجحين اكتشفوا إن كلهم كانوا بيتفقوا في شيء واحد.. هو إن عندهم حلم كبير قوي.. حلم مش عادي!
كان فيه شاب اسمه "خالد".. "خالد" ده يا جماعة فقد ساقه اليسرى في حادث سيارة وأجبر إنه يكون معوق.. وبما إنه كان مؤمن بنفسه وبقدراته فكان عنده حلم كبير قوي..
تخيل كان بيحلم بإيه؟
كان بيحلم إنه يكون بطل رياضي ويعدّي المانش!!!!
طبعا نقدر نتخيل الناس اللي حواليه كانوا بيقولوا ليه إيه.. أكيد قالوا له إن مفيش معوق قدر يعدي المانش.. أكيد قالوا له: "احلم على قدك".. أكيد كل واحد منهم كان متخيل إنه عايز مصلحته.. كانوا معذورين طبعا عشان دي برمجتهم الداخلية واللي اتربوا إنهم يقولوه... لكن "خالد" كان مؤمن بحلمه الكبير وكان متأكد ومؤمن بنفسه وبقدرته على تحقيقه...
وبالفعل...
استطاع "خالد حسان" إنه يعبر المانش بساق واحدة ويبقى أول معوق يعبر المانش في التاريخ...
إيه رأيك؟؟
الباحثين اكتشفوا إن حلمك لو كان صغير فده معناه إنك بتحط لنفسك حواجز تمنعك إنك تتخطى الحلم ده..
يعني اللي بيحلم يطلع التاني, عمره ما هيكون الأول!!
العقل الباطن بتاعنا بياخد مننا احنا المعلومات ويعمل على تحقيقها بدون وعي.. فلما تقول لنفسك أنا نفسي أطلع التاني, العقل الباطن هيتبرمج على الحقيقة دي وإنك مستحيل تطلع الأول لأن ده مش في الخطة أساسا.. فهيعمل على تحقيق حلمك الصغير بمجهود يتناسب مع صغر الحلم ده.. فهمت ازاي؟
يبقى احلم أحلام كبيرة.. عشان هي دي اللي هتوصلك للنجاح وتخليك تمشي في اتجاهه.. كل ما كان حلمك كبير كل ما كان الدافع لتحقيقة أكبر وأكبر